ثيابي من جمر نار دولي
اجرحتني وما اظن ينفع دوا لي
علية شبيك متكبر دولي
حبيبي شنو انت بالنسبة الية
.
.
اذا احجي الحبايب صدقني
لان دومي بوعودي صادق اني
بنات هواي قبلج صادقني
بس مو مثلج ايضحكن علية
.
.
احبج يا فلانة يا نبعة الريحانا
ولا غير حبج بهل الدنيا ريح انا
بعدلي اسبوع يمج رايح انا
لسوريا الاسد للموت للمنية
.
.
اظل دوم اعرف اخبارك وسلبيك
وادور وين زيناتك وسلبيك
طلعت النوب متمرض وسل بيك
حظنتك ونقلت مرضك الية
.
.
راح ابتعد عن المحبوب واهجرة
لان طول غيابة وهجرة
اتلثم واطب لبيتة واهجرة
واسويها شغلة طائفية
.
.
يلي تعذب الروح عوف الروح خلها
عساها اتموت بعد فراك خلها
لزم ايدي الدكتور وصحت خلها
العلة بالقلب جا شلك بدية
.
.
وجت نار قلبي بس طفت بيك
ولو مو كعبة انت بس طفت بيك
امس ما شفتك انا بس طفت بيك
خدرت وجن قلبي واكع بدية
.
.
وهاي للعراق الغالي
.
اختلفنا باولياء الله وضعنا
واحنا اساس للدنيا وضعنا
وربك ما نغير من وضعنا
شرط الة تحط ايدك بدية
.
.
قطرة حية انا وانت كصة
ويعرفنا النشد عنا والتكصة
احنا بجسد واحد والتكصة
جفك لا تظن كصيت بية
.
.
الفضل والاعظمية جا نسني
ومصابيهم على مصايبي جانسني
اخوية كبال بيتي جان سني
وانزور حسيين انا ويا سويا
.
.
اعلن يا قلب حبك وشيعة
واتبع راي كل مسلم وشيعة
عيب حجاية السنة وشيعة
الوطن لهل الوطن كلهم سويا
.
.
عمري تيهيتة وضاع سني
كبرت ووكع من كدام سني
شيعي وجيف احبة صرت سني
واجتف بالصلاة غصبا علية
الأحد أغسطس 24, 2008 8:31 pm
